រុស្សី៖ រដ្ឋាភិបាលរុស្សី បានសម្រេចបញ្ចេញកញ្ចប់លុយ ៥០០លានដុល្លារអាមេរិកទៅឱ្យប្រទេសបេឡារុសខ្ចីបន្ថែមទៀត ដើម្បីជាជំនួយគាំទ្រដល់ប្រទេសនេះ បន្ទាប់ពីប្រទេសស្ថិតក្នុងទ្វីបអឺរ៉ុបខាងលើបានរងទណ្ឌកម្មផ្នែកសេដ្ឋកិច្ច និងការថ្កោលទោសពីសហគមន៍អន្តរជាតិ ក្រោយពីបានបង្ខំឱ្យយន្តហោះមួយគ្រឿងចុះចតភ្លាមៗ និងបានឃាត់ខ្លួនអ្នកសារព័ត៌មានមួយរូបក្នុងយន្តហោះនោះកាលពីពេលកន្លងទៅ។ 

ការប្រកាសនេះបានធ្វើឡើងដោយលោកប្រធានាធិបតីរុស្សី វ៉្លាឌឺមៀរ ពូទីន នៅក្រោយកិច្ចប្រជុំរយៈពេល ២ថ្ងៃជាមួយជាមួយប្រធានាធិបតីបេឡារុស្ស លោក Alexander Lukashenko នៅក្នុងទីក្រុង Sochi ប្រទេសរុស្សី។ មិនត្រឹមតែជំនួយផ្នែកឥណទានប៉ុណ្ណោះទេ រុស្សីថែមទាំងបានសន្យាថានឹងព្យាយាមបង្កើនជើងហោះហើររវាងប្រទេសទាំងពីរឱ្យបានកាន់តែច្រើន ក្រោយពីបណ្តាប្រទសក្នុងតំបន់អឺរ៉ុបបានចៀសវាងការហោះហើរលើដែនអាកាសរបស់បេឡារុស្ស ព្រមទាំងបិទប្រតិបត្តិការជាមួយជើងហោះហើររបស់អាកាសចរណ៍បេឡារុស្ស (Belarus Airlines) ថែមទៀតផង។

គួរបញ្ជាក់ថា កញ្ចប់ទឹកប្រាក់ ៥០០លានដុល្លារនេះគឺជាផ្នែកមួយនៃការសន្យាផ្តល់កម្ចី ១,៥ពាន់លានដុល្លារពីសំណាក់រុស្សីទៅកាន់ប្រទេសបេឡារុស្ស។ ឥណទាននេះនឹងត្រូវផ្តល់ឱ្យបេឡារុស្សនៅដំណាច់ខែមិថុនានេះ ខណៈលុយ ៥០០លានដុល្លារលើកទី១ បានផ្តល់ឱ្យតាំងពីខែតុលា ឆ្នាំ ២០២០កន្លងទៅ។ កិច្ចពិភាក្សារវាងថ្នាក់ដឹកនាំរវាងប្រទេសទាំងពីរនេះ គេក៏ឃើញពីភាពល្អូកល្អឺនរវាងប្រធានាធិបតីប្រទេសទាំងពីរផងដែរ ពោលគេឃើញលោក ពូទីន និងលោក លូកាសេនកូ ស្ថិតនៅលើនាវាកម្សាន្តមួយជជែកគ្នា និងមើលត្រីដូហ្វីននាឆ្នេរសមុទ្រប្រទេសរុស្សី៕